Plantun de Prouvènço

Pèr coumpara dos planto d'encò nostre

Sagina procumbens & Typha domingensis

Sagina procumbens

Caryophyllaceae

Nom en français : Sagine couchée.

Descripcioun :
La sagino-rebaladisso es uno planto renadivo que trachis sus li roco imourouso e li riéusset. Fai uno pichoto mato de fueio primo, longo e acabado pèr uno pichoto arèsto. Li flour an quatre petalo. Au contro, sa cousino, Sagina apetala es uno planto de l'an dreissado que trachis dins li pelouso sablouso. Coumpara emé la sagino-sènso-petalo que ié sèmblo proun.

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 2 à 10 cm
Fueio : óupousado
Tipe bioulougico : Camefite
Cicle bioulougico : Planto renadivo

Gènre : Sagina
Famiho : Caryophyllaceae

Ordre : Caryophyllales

Coulour de la flour : Brunello
Petalo : 4
Ø (o loungour) flour : 5 à 15 mm
Flourido : Printèms - Estiéu - Autouno

Sòu : Si
Autour basso e auto : 0 à 2300 m
Aparado : Noun
Abriéu à óutobre

Liò : Riéusset - Ribo d'aigo - Roco imourouso
Estànci : Subremediterran à Subaupen
Couroulougi : Éurousiberiano
Ref. sc. : Sagina procumbens L., 1753

Paviho-rousso

Typha domingensis

Typhaceae

Àutri noum : Fielouso, Filouso, Masseto, Cire, Sagno.

Nom en français : Massette australe.

Descripcioun :
Coume tóuti li Typha, la paviho-rousso se recounèis à sis espigo femello e masclo. N'i'a cinq meno de Typha ; aquelo se destrìo, de segur de la coulour de l'espigo femello, rousso, mai peréu de si fueio pas trop largo e en mié-ciéucle en coupo, e tambèn de la loungour de separacioun entre li dos espigo (2 cm). Li fueio an d' auriheto gaire redouno au contro de T. angustifolia (vèire lou dessin).

Usanço :
Li fueio de paviho podon èstre utilisado pèr lou sagnage di cadiero e li flour pèr rempli li matalas. Se saup mens que li brout soun manjadis coume d'espargo. Se pòu faire de farino emé li racino e uno meno de pan emé l'agriero.